OnsHekel: February 2015

Gistermiddag is my eerste pakkie wol al die pad vanaf Istanbul, Turkye, reg by my voordeur afgelewer. Nege dae vanaf die laaste kliek met my muis, via London, via Johannesburg, weer op 'n vliegtuig George toe, en die pakkie agterin 'n trok (!) tot hier by my.

En dit alles teen goedkoper as enigiets wat ek hier ter plaatse kon koop..

Dis nou in 100% wol, nè.

Hier is dit!

My lang-beplande winterkombers kom al 'n lang pad. Eers sou dit die Great Romany Blanket wees, n.a.v.'n dekorartikel in dié styl. Mosaieksteek, als in bont, (semi)-helder kleure, beste kwaliteit wat ek kan kry. Siende dat 100% wol nie die goedkoopste ding op straat is nie, (of by elke tweede winkel beskikbaar nie!), koop ek twee bolletjies hier, vier bolletjies daar, een op 'n slag. Hier merino, daar African Expressions, bietjie One of a Kind, en so gaan ek aan. Ek sien ek sal moet aanvul met mengsels, so my standaard gaan af tot 50% wol. Ek begin solank werk, ek hékel daardie mosaïeke. Dit raak warm en ek sit eers neer, en maande later is die kleure nie meer mooi nie, nou hou ek nie meer van die samestelling nie. Sal ek uittrek, sal ek aangaan? Ek stop net daar, verklaar dit 'n lang, smal (wel amper 1m breë) TV-kombers - jy kan jouself behoorlik daarin toedraai - en begin weer.

Nou gooi ek die perse en pienke uit, daar was te veel, ook die gele wat bietjie te mostert raak. Meer groen en blou. Dis Yarn Indaba en ek kóop! Cowgirl Blues, Karoo Moon, maar net 'n handvol op 'n slag, nè, dis 'n paar rand daai. So word die krat weer stelselmatig vol, ek gooi die mengsels uit.

Toe kyk ek dit so en op die impuls van die oomblik besluit ek op 'n ander patroon, die een met miljuisende ffrafels. Niks meer van eenvoudige, min kleurveranderinge nie, nee, Flowers in the Snow sal dit wees, want ek is mal oor die hegting (kyk, dis nie dieselfde JAYG as Attic 24 s'n nie). maar watter agtergrond kleur? Want ek wil nie wit hė nie. Ook nie blou nie, dis te koel, en die kamer is klaar koel en dis koud in die winter as dit reën. Visueel moet dit ook warmer wees.

Alice se Gypsy Caravan Blanket is altyd in my agterkop, die beautifulste ongekleurde wol, so natuurlike bruingrys, maar waar, o waar, kry mens dit hier?

Ek skrop weer deur die krat, en gryp die éen grys bolletjie Rowan Cocoon wat ek het...dis supersag, dis 'n mooi grys, dít gaan werk! Ja, hekel gou 'n sample-blokkie, en dis perfek, maar ek onthou die prys, dit was hier rondom R180 vir die bol!

Vir die eerste keer doen ek somme. Trek die laaste grys randjie uit, meet die string wol...dis net oor die 7m vir rondte 4.

Vermenigvuldig met 288 blokkies (want ek meet toe eers die blokkie, en die bed, en doen daai som ook...). Kyk na die meters op die bol en hoeveel blokkies ek daaruit gaan kry...en daar moet nog 'n mooi rand ook gehekel word...nou lyk dit al na hier by die 26 bolle.

x R180.

Soos my man sê - hierdie kite gaan nie vlieg nie. Want die wolle moet nog uit Ingeland uit kom.

So ek begin soek ter plaatse. Hier is tog mooi wol, met 80% merino en 20% mohair? Ja hier is, maar dis 'n 'flat' loodgrys. Hier's nog mooi 100% sagte DK, maar dis net té gespikkel. Ek kry nog een, bietjie lig, die grys, maar daar's darem bruinerig ook in...maar dis hard, en werk amper dieselfde uit. Nêrens gaan ek genoeg op een slag van een batch kry nie.

Ek is déur die online winkels.

Ek is déur die alternatiewe en plan B's in my kop. Sal ek iemand vra of hul nie lus het om vir my, spesiaal, 28 bolle te kleur nie...?

Ek's naderhand so moedeloos, ek's sommer terug in die krat. Sal ek nie 'n ander kleur as rand gebruik nie? Gryp my peperduur Malabrigo en begin hul ook in die blokkies gebruik (hoekom nie? Dis so sag, dis so mooi, ek breek al klaar die bank).

En toe een aand kom Yarnshop se skakel weer verby op Faceboek, en hierdie keer sien ek dadelik die regte grys en dis 100% wol en ek hét nou al gehoor die mense is tevrede en dis Baie Beter Op Die Sak.

4 in 'n pak. x7. En die prys is reg.

Net daar bestel ek dit. 28 bolle x 100g. Skooltruigrys, noem ek dit. Dis nie so sag soos die Cocoon nie, dis waar, maar dis sag genoeg. Die kleur is reg. Daar's genoeg in voorraad, meer as wat ek wil hê.

Die prys is reg.

En net daar kliek my muis en daar kom my wol van doer ver af.

Hier kom 'n winterkombers.

Volgende keer koop ek weer Proudly South African, maar dié keer het die beursie harder gepraat.

-- 0 --

Intussen, as jy plaaslik wil bestel...ons het hope mooi wol om uit te kies! Ek het byna van elkeen 'n bolletjie wat in my kombers gaan verskyn. En hier is ons aanlyn-winkels, soos ek hul kon bymekaarkry - laat weet gerus en asb indien ek iemand uitgelaat het:

50 Something